حسبوها عين جارية .. بقلم .. مليكه بوبراهيمي
حسبوها عين جارية
تسري ماء
تسقي الارض العطشانة
ؤ هي دمعة
نزلات قطرا قطرا
ؤ رجعات وديان
من كثرة لهموم
سقات قلوب
ؤ رسمات سواقي
على لخدود
الوجه تكمش
ما بقى يسوى نكلة
شكون بحالي يا ناس
شاف الحكرة و القهرة
شكون بحالي ياناس
تلف لهضرا
ما بقى عارف
لين يرد الراس
من كثرة لهم
نبات بلا نعاس
نعد النجوم ؤ نخمم
ف لحمل ل ثقل
شكون بحالي
يخمم كيف يوقف
على رجليه
ؤ هو حقو مهضوم
ما قادر يتكلم
شكون بحالي
يوقف ف وجه الطوفان
لولاد همهم كبر
ولا من قال هذا
الشيء حرام
ؤ هذا هو المنكر
علاش تضحك
و انت الشوكة
مضروبة فيك
و فيا حتى ل جدر
علاش تغطي عين الشمس
بالغربال
وتقول انا قطعت الواد
ؤ نشفو رجليا.....
ما زال...... ما زال الحال
ما وصل...... ما زال...
مليكة بوبراهيمي
تعليقات
إرسال تعليق