الأخ والاخوة//بقلم الشاعر علي مسلم عجمي
( الأخ و الأخوة ) للشاعر الدكتور علي مسلم عجمي
-------------------------
الأخ جوات القلب حل و قعد
و مع كل نبضة زاد بالإلفة و صعد
بينصر أخوه و دوم جاهز و استعد
يوقف بجنبو لو خصم هاج و رعد
بالتآخي كل من حولو سَعَد
و الخصم منهم خاف حتّى و ارتعَد
و بالكورونا يموت أشرفلو كتير
و ما يقولوا أخ عن خيو تبتعَد
الأخ قدوة صالحة و بيغمرك
بالعاطفة و نهج الأخُوِّة بتأسرك
في الأخوِّة الأخ ما بينصب شرك
لخيو و يحصل بينهم أي معترك
لإنك إبن أمو و بيو بيظهرك
في كل محفل رائدو و ما غيَّرك
حتّى إله الكون رب العالمين
بيشد عضدك في أخيك و ينصرك
لو صاب خيّك وَهِن لازم تحملو
على ظهرك أو كتافك يا حلو
و الناس لو سألوا شو يللي بتعملو
قلهم خيي و ما بقدر إهملو
حملي خفيف الوزن لو جسمو مَلُو
و لو كان وزنو الكون كلو بأكملو
الأخ أب و سَنَد و عيون و صديق
و ملح العلاقة الأخ و الذوق الحلو
الأخوِة ما لازم عن بعض يتباعدو
و خيك إذا اختلت أساس قواعدو
إيدك بإيدو و ساعدك في ساعدو
استعمل الحكمة و العقل تا تعاضدو
ان كان ظالم عن ظلامو بيعدو
و عالفو و الأخلاق حثو و واعدو
لكن إذا مظلوم من ظالم غشيم
واجب عليك بكل جرأة تساعدو
الشاعر د. علي مسلم عجمي
لبنان
تعليقات
إرسال تعليق